Winter
Usem stärneklare is-chalten Abe
falle Flocke gross wi Watteböisch
setzte grüschlos sech uf wyssi Kumpane
u wärde mitnen eis
Bilde tuusigfach e glitzerndi Dechi
über Hüser, Fälder, Wäg u Strass
decken alles zue mit ewigem Fride
begrabe Dräck und Hass
Und ä Stärn dert gägen Oschte
strahlt ganz bsungers klar
schiint e Friedensbotschaft ds bringe
villicht scho fürs nächschti Jahr
Lutlos falle neui flockigi Fätze
wyssi Striche i der hälle Nacht
fahl belüchtet vo der milchige Sichle
wo alles silbrig macht
|
Süsch bewegt sech nüt, ke Ton chame ghöre
isch se das jitz üsi heili Wält?
S'schiint sogar das nüt d'Natur chönnti störe
das nüt hie unde fählt
U dä Stärn dert gägen Oschte
strahlt ganz bsungers klar
schiint e Friedensbotschaft ds bringe
villicht scho fürs nächschti Jahr
Hoffe mir, das är uf üseren Ärde
hilft dass Mönsche wieder Mönsche si
dass si wi die Flocke eis chönnti wärde
der Friede chiem de gli
der Friede chiem de gli
|